Die aarde en alles wat daarin is.
Genesis 1 vers 27: God het die mens geskep as sy
verteenwoordiger, as beeld van God het Hy die mens geskep.
Genesis 1 vers 28: Toe het God hulle geseën en vir hulle gesê:
“Wees vrugbaar, word baie, bewoon die aarde en bewerk dit. Heers
or die vis in die see, oor die voëls in die lug, oor al die
diere van die aarde, ook oor die diere wat op die aarde kruip.” Wat ‘n wonderlike voorreg wat die mens te beurt geval het. Ons
is nie net na die beeld van God, die Allerhoogste, geskape nie,
Hy het ons ook die gawe gegee om kinders voort te kan bring.
Maar dis nie al nie. Ons is as heersers oor die diereryk
aangestel, en ons is vrye gebruik van die aarde gegun. Die
Almagtige God het soveel vertroue in die mens gehad dat hy ons
verteenwoordigers gemaak het van alles wat Hy tot stand gebring
het. Genesis 1 vers 31: Toe het God gekyk na alles wat Hy gemaak
het, en dit was goed. Hy was tevrede met Sy handewerk.
God heg waarde aan alles wat Hy tot stand gebring het en verwag
dit van ons om dit alles te vertroetel en te bewaar, nie net vir
onsself nie, maar ook vir ons nageslag. Soms aanvaar ons dinge
vanselfsprekend, maar het u al gewonder hoe leeg en
oninterresant die wêreld sonder plantegroei en diere sal wees?
Het u al ooit op ‘n lente-oggend in die veld gaan stap? Dink
maar net aan u jaarlikse vakansie langs die see, uitstappies na
die tuine, wildtuine of selfs net ‘n pieniek in die buitelug.
Wat ‘n belewenis om die vars geure in te asem en die kleureprag
te sien! Dit alles het God vir die mens gemaak om te aanskou en
te geniet. Hoe kan ons dan anders as om God te dank, loof en
prys omdat Hy ons verteenwoordigers van die aarde, en alles wat
daarin is, gemaak het. Wat ‘n eer en ‘n voorreg!
Psalm 8 verse 4 tot 10: As ek U hemel aanskou, die werke van u
vingers, die maan en die sterre waaraan U ‘n plek gegee het, wat
is die mens dan dat U aan hom dink, die mensekind dat U na hom
omsien? U het hom net ‘n bietjie minder as ‘n hemelse wese
gemaak en hom met aansien en eer gekroon, U laat hom heers oor
die werk van u hande, U het alles aan hom onderwerp: skape en
beeste, alles; selfs die diere in die veld, die voëls in die
lug, en die visse in die see wat die oseane deurkruis. Here, ons
Here, hoe wonderbaar is u Naam oor die hele aarde!
Butterfly
|
